Welcome to Lisu Myalu blog... LI-SU MY-LU KW BE HW. HW. BAE FU L,_ NGO=

Wednesday, April 2, 2008

AIDS( Lo. ae; ) na., xue: tae mo. soe. le tzi_ ma



AIDS ( Lo. ae; ) na., xue: da: thew ma nya-. nae., tsi; xya, ma: da, ma na., xue: thi: xue: nga lo=
Na., xue: thew ma zo.. la, nya xue., na ka, ma le ngo= Go lew nyi na., xue: thew ma ma: zo.. la na, ma ro a jue: su rza., mu jue: jo_ ma ngo= Ro: xue: tae ni, nue.,_ ma kwa be AIDS na., xue: tae mo. hwa.. zi; si sae; gei: khei: bo fu la_ ngo=
1.
AIDS na., xue: nya a xue: nga la?
AIDS na., xue: bae ma nya-. Acquired Immune Deficiency Syndrome bae_ ma-. hwa: go dew: sae; tae ba: ( yi.,) le tzi_ ma na., xue: nga lo= AIDS na., xue: nya HIV bae_ ma na., bei: de., ( bi: de.,) kwa be phyew; la, ma nga lo= AIDS nya na., xue: myew.. nga si-. HIV nya na., bei: de., myew.. nga_ lo= HIV na., bei: de., nya mya sei le mo., ma: da= Ro.. di.. le_ ma na., bei: de., nga_ma wu. nyi Microscope kwa be_ le: lo. mo., wa da,_ lo= Bei: de., thew ma nya-. xue: (si:) nae.; kwa a rza., si phyew., je_ lo-. bae nga_ mi hwa: go dew: sae; tae ni, tsa za: hei: ye ba la_ lo=
2. AIDS na., xue: a le kwa be phyew; wu. tu la_ la?
HIV na., bei: de., thew ma tae-. Africa mue: yi., mei. ( South Africa) kwa tya ma cae, me;( ca, me;) hwa: xue: kwa be yi. wu. phyew; la _ lo-. be swa' do la_ lo=Go kwa tya ma hwa: xue: hwa: jue:(cae, me;) kwa be thi tza. la: tso nae.; kwa due: la_ lo-.be mi nae soe ni, jo pha bu le swa' do la_ lo=
3. A xue: wu. nyi na., xue: thew ma ni, tsa ji. je ba., la, la?
Mi nae thew ma nya thi nyi le thi nyi wu: mu la tya_ lo= Je je la: la: du..do sa.,_ ma vya; nyi nga lo=Thew thi: kuoe kwa be new. bae; thi: kuoe kwa-. thew thi: mue: kwa be new. bae; thi: mue: kwa ni, tsa je chi ye ba., la_ lo= Rzei vya; nyi wu: mu la, ma le be-. tso rza tya cew,-, tso jo cew, nga_ mi lei. pa je tya_ lo=
Tso pa rza-. rza mei rza ja.. lae kho_ ma( vya; cho: hwa._ma) mi wa zi mya: la_ lo= Yae., phi. tae mei: nei, le: do.,_ ma_ le: ma: tsi-. xue:(si:) ju: nae.; kwa thu.(ka.) kei_ ma mi jo la_ lo= Thi: ro rew: kei_ ma nae., tsi; thu. ka. tae new. bae; thi ro pae, rew:_ lo= Tzai go., wu: ma bu_ be vya; cho: hwa._ lo=
Thew lew ye_ ma kwa be thi: ro kwa be thi: tsa.new. bae; thi: ro tae ni, tsa ci. pyew., je_ lo= HIV na., bei: de., ci. phyew., je_ ma nya thi: xue: kwa be_ le: ma: nga-. a mya, xue:-. a mya, cew. kwa be ci. phyew., je_ ma wu. nyi-. thi mi nae lew.; kwa pyew., je ma nga lo=
4. AIDS na., xue: tae a xue: mue: kwa yi. wu. lo. mo_ la?
AIDS na., xue: thew ma tae 1981 kho; thae America kuoe-.Califonia kwa yi wu. hwa., mo_ lo=1981 kho; thae: si hwa., mo_ lo-. bae nga mi-. 1981 kho; hei. thae:_ le AIDS na., xue: jo tya lo be swa' do la lo=
5. AIDS na., xue: tae a xue: la tso kwa yi. wu. lo. mo_ la?
AIDS na., xue: tae mi nae bei: due:( Western) kwa tya ma rza cho: rza hae: cho: hwa., lae kho su nae; kwa yi. wu. lo. mo_ lo= Go kwa be thi: tza-. tso pa rza-. rza mei; rza hae: cho: hwa-. yae., phi.( ya., phi.) si:(xue:) jo: nae.; kwa ka koe_ ma kwa be na., xue: thew ma ni, tsa ci. je_ lo=
Bei: do (Asia) thi: pho, kwa nya yae., phi.( ya., phi.) ka su nae.; kwa yi. wu. lo. mo_ lo= Go thi ho: kwa be thi: tza go., wu: ma-. hae; cho: hwa su bu kwa be thi: tza vi., si pha vi., si ma bu nae.; kwa ci. phyew., je_ lo= Yi mei: kwa a xue: na mi tzui ma: jo su rza new rza bu tae na., du zo.. le_ ma ngo=
6. HIV na., bei: di 2 xue: jo_ lo=
Nyi. nyi tso rza tae na., tya ma HIV na., bei: di 2 xue: jo_ lo-. be lo. do la_ lo= Mi nae thew ma kwa a khei na., phyew je_ ma nya HIV-1 thew ma nga lo= HIV-2 thew ma tae 1986 kho; thae-. hwa me, mo le_ lo= HIV-1 be HIV-2 nya xew, xuew.; be ka, nga mi-.yi ci nya ma: xew, lae kho= HIV-2 nya HIV-1 le be ci. je_ ma: sa.,= Na., xue: nga mi HIV-1 nya ma: ya;( ma: vei)= HIV-2 tae nya Africa mue: kwa_ le lo. mo wa_ lo= Lo: mi: mue: kwa ma: lo. mo se=

Ma: gu le se: .....

No comments: